Ukrayina arbiyleri, gece Rusiye ücüm etken 88 dronnı yoq etti, dep bildire Ukrayina Arbiy ava quvetleriniñ telegram kanalında.
Beyanatqa köre, Rusiyeniñ dronları memleketniñ şimalinde, şarqında, cenübinde ve merkezinde yoq etildi: 40-ı ateş vastaları ile urulıp tüşürildi, 48-i REB tarafından yoq etildi.
6 yerde duşmannıñ ava ücüm vastalarınıñ urulması qayd etildi.
Ukrayina Arbiy-deñiz quvetleriniñ ava quvetleri bildirgenine köre, ilk yaz ayınıñ 19-na keçken gecesi duşman 104 "Şahed" tipli dronnı ve çeşit pilotsız uçaqlarnı qullanıp, Millerovo, Kursk, Orel, Rusiye Federatsiyasınıñ Primor-Ahtarsk, Çauda yönelişlerinden ücüm etti.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
